ഹോജ കഥകള്‍ - 1

ഹോജയും കത്തെഴുത്തും 

ഹോജയുടെ ഗ്രാമത്തിലെ ഏറ്റവും വിദ്യാഭ്യാസമുള്ള ആള്‍ ഹോജ ആയിരുന്നു.  എന്ന് വെച്ചാല്‍ ഹോജയുക്ക് അത്യാവശ്യം എഴുതാനും വായിക്കാനും അറിയും, അത്രമാത്രം.  നാട്ടുകാര്‍ക്ക് ആര്‍ക്കെങ്കിലും ഒരു കത്ത് എഴുതണമെങ്കില്‍ ഹോജ മാത്രമാണ് ശരണം, ഒരിക്കല്‍ ഗ്രാമ വാസിയായ ഒരാള്‍ അടുത്ത ഗ്രാമത്തില്‍ താമസിക്കുന്ന മകന് ഒരു കത്തെഴുതുവാന്‍ ഹോജയെ കാണാനെത്തി.

ഹോജാ... കുറച്ചു കാലമായി മകന്റെ വിവരം ഒന്നും ഇല്ല , ഒരു കത്തെഴുതണം.

ഒന്നാലോചിച്ചിട്ട് ഹോജ പറഞ്ഞു .... നിങ്ങള്‍ ഒരാഴ്ച കഴിഞ്ഞു വരൂ... എന്റെ കാലിനു നല്ല സുഖം ഇല്ല.  

ആശ്ചര്യപ്പെട്ടു കൊണ്ട്  ഗ്രാമവാസി ചോദിച്ചു ... ഹോജ കത്തെഴുതുന്നത് കൈ കൊണ്ടല്ലേ ?  അതിനു കാലുമായി എന്ത് ബന്ധം ?

നിങ്ങള്‍ക്കറിയില്ല .... ഞാന്‍ എഴുതിയ കത്ത് വായിക്കാന്‍ എനിക്കെ പറ്റൂ.  അപ്പോള്‍ നിങ്ങള്‍ ഇപ്പോള്‍ കത്തയച്ചാല്‍ ആ കത്ത് വായിക്കാന്‍ എനിക്ക് തന്നെ അടുത്ത ഗ്രാമത്തില്‍ പോകേണ്ടി വരും.  അത് കൊണ്ട് എന്റെ കാലു ശരിയാവട്ടെ , എന്നിട്ട് കത്തെഴുതാം .